འཛམ་གླིང་གི་ཆོས་གྲོགས་ཕོ་མོ་ཡོངས་ལ་བསྟན་པ་གཅིག་གི་སྟོན་པ་མཉམ་མེད་ཤཱཀྱའི་རྒྱལ་པོའི་སྐུ་ཡི་འཁྲུངས་སྐར་གཅིག་གྱུར་སྲུང་བརྩིའི་འབོད་བསྐུལ་གསལ་བརྡ།
བསྟན་འདི་ཡི་སྟོན་པ་གཅིག་པུ་མཉམ་མེད་ཤཱཀྱའི་རྒྱལ་པོའི་སྐུ་ཡི་འཁྲུངས་སྐར་གཅིག་གྱུར། བསྟན་པ་གཅིག་ལ་སྟོན་པ་གཅིག་ལས་མེད་ལ། སྟོན་པ་གཅིག་པུ་དེ་ནི་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོ། ཤེས་རབ་དང་སྙིང་རྗེའི་བདག་ཉིད་ཅན། འགྲོ་བ་མི་ཡི་རིགས་ཀྱི་རླབས་ཆེན་གྱི་འདྲེན་པ་ཆེན་པོ་སྟེ། ཆོས་ཐམས་ཅད་ཀྱི་གནས་ལུགས་བདེན་པར་བསྟན་ཞིང་། འགྲོ་བ་ཡོངས་ལ་བདག་ཉིད་བདག་གི་མགོན་དཔུང་ཡིན་པའི་གསལ་བཤད་མཛད་ཡོད།
དེ་ཡང་རང་གཞན་སུ་ཡང་སངས་རྒྱས་ལ་འགྱུར་དུ་ཡོད་པར་བཀའ་བསྩལ་པ་དང་། དེ་ལྟར་སངས་རྒྱས་འགྱུར་དུ་ཡོད་པའི་གཏམ་དེ་ཡང་འུར་བརྗོད་དང་ཚོད་དཔག་ཙམ་དུ་མ་སྐྱུར་བར། སྟོན་མཆོག་ཐུབ་པའི་དབང་པོ་རང་ཉིད་སྐུ་དངོས་སུ་འཕགས་པའི་བདེན་པ་བཞི་དང་། སྦྱིན་སོགས་ཕ་རོལ་དུ་ཕྱིན་པའི་ལམ་ལ་ཞུགས་ཏེ། བག་ཡོད་དང་དྲན་ཤེས་བརྟན་པོས་སེམས་རྒྱུད་ཀྱི་རྣམ་རྟོག་ངན་པ་དེ་དག་རེ་རེ་བཞིན་ཕར་ལ་བསལ་ཞིང་། ལྷག་བསམ་དང་སྙིང་རྗེ་སོགས་དགེ་བའི་བསམ་བློ་རེ་རེ་བཞིན་རྒྱུད་ལ་སྦྱར་ནས། ལམ་ཉམས་སུ་བླངས་ཤིང་དཀའ་བ་སྤྱད་དེ། མཐར་འགྲོ་བ་ཡོངས་ཀྱི་མིག་ལྟོས་སུ་འོས་པའི་སྐྱོན་ཟད་ཅིང་ཡོན་ཏན་གྱིས་ཡོངས་སུ་གང་བའི་སངས་རྒྱས་ཞེས་པའི་སྐྱེས་བུ་ཁྱད་པར་དུ་འཕགས་པ་ཞིག་ཏུ་གྱུར་པ་རེད།
དེ་ལྟ་བུ་འགྲོ་ཡོངས་དང་ལྷག་པར་དུ་འཛམ་བུ་གླིང་པའི་འགྲོ་བ་མི་ཡི་རིགས་ཡོངས་ལ་བྱམས་བརྩེ་དང་ཞི་བདེའི་ཤུགས་རྐྱེན་ཆེ་ཤོས་བསྩལ་མཁན་གྱི་སྟོན་པ་ཐུགས་རྗེ་ཅན་དེ་ཉིད་ཀྱི་སྐུ་ཡི་འཁྲུངས་སྐར་ནི། ང་ཚོ་འཛམ་བུ་གླིང་པ་ཡོངས་ཀྱིས་དུས་གཅིག་ཏུ་ཆབས་ཅིག་ཏུ་སྲུང་བརྩི་ཞུ་འོས་པ་ཞིག་རེད། ལྷག་པར་ནང་པའི་ཆོས་གྲོགས་ཡོངས་ཀྱིས་མ་གྲོས་གཅིག་མཐུན་གྱིས་ཁོང་གི་སྐུ་ཡི་འཁྲུངས་སྐར་སྲུང་བརྩི་དུས་གཅིག་ལ་ཆབས་ཅིག་ཏུ་ཞུ་འོས་པ་ནི་སྨོས་ཅི་དགོས།
འོན་ཀྱང་ད་ལྟའི་བར་དུ་འཛམ་གླིང་ནང་པའི་ཆོས་གྲོགས་ཡོངས་ཀྱིས་ཁོང་གི་འཁྲུངས་སྐར་གཅིག་གྱུར་གྱིས་ཐེངས་གཅིག་སྲུང་བརྩི་གནང་མྱོང་ངམ། གཏན་ནས་གནང་མྱོང་མེད། འདི་ནི་ང་རང་ཚོ་ནང་པའི་ཆོས་གྲོགས་ཚོར་མཚོན་ན་ངོ་གནོང་འོས་པའི་གནད་དོན་ཞིག་ཡིན་ཏེ། ཐ་ན་འབྱོར་འབྲིང་གི་ཁྱིམ་ཚང་ཞིག་གི་ཕ་རྒན་ཞིག་ལ་མཚོན་ནའང་། ཁྱིམ་ཚང་དེའི་བུ་བརྒྱུད་ཐུན་མོང་ནས་འཁྲུངས་སྐར་གཅིག་གྱུར་ཞུས་པའི་དགའ་སྟོན་གྱི་གོ་སྐབས་ཡོད། འོན་ཀྱང་བདག་ཉིད་བདག་གི་མགོན་དང་དཔུང་གཉེན་སངས་རྒྱས་སུ་འགྱུར་དུ་ཡོད་པའི་བདེན་པའི་ཚིག་དང་ཉམས་ལེན་གྱི་ལམ་ནས། ཐར་པའི་སྒོ་ཆེན་མིག་མཐོང་ལག་ཟིན་དུ་ཡོད་པ་འདི་ལྟར་ཤུལ་བཞག་མཛད་མཁན་གྱི་སྟོན་པ་ཐུགས་རྗེ་ཅན་ཁོང་ལ་འཛམ་བུ་གླིང་ཡོངས་ལྟ་ཅི། ཐ་ན་ང་རང་ནང་པ་སངས་རྒྱས་པའི་ཆོས་གྲོགས་ཡོངས་ནས་ཀྱང་ཁོང་ལ་གཅིག་གྱུར་རང་བཞིན་ཅན་གྱི་སྐུ་ཡི་འཁྲུངས་སྐར་ལོ་རྒྱུས་ནང་དུ་ད་བར་ཐེངས་གཅིག་ཞུ་མ་མྱོང་།