བསྟན་པ་འཛིན་པའི་དགེ་འདུན།
སྟོན་འདས་པའི་མི་ལོ་ཉི་སྟོང་ལྔ་བརྒྱའི་ཡུན་ལ། སངས་རྒྱས་ཀྱི་བསྟན་པའི་རྗེས་སུ་ཞུགས་པའི་གྲོགས་ཚངས་པ་མཚུངས་པའི་དགེ་འདུན་པ་རྣམས་ཀྱིས་སངས་རྒྱས་ཀྱི་བཀའ་དྲི་མ་མེད་པ། ལྷག་བསམ་དང་ཤེས་རབ། སྙིང་རྗེ་དང་གནས་ལུགས། འཚེ་མེད་ཞི་བདེ་འབའ་ཞིག་ལ་གཞི་བཅོལ་བའི་དགོངས་དོན་དེ་བདེན་པ་ཡིན་པའི་དཔང་པོ་ལྟ་བུར་བཞུགས་ཡོད། འདི་ནི་ལས་སླ་བོ་ཞིག་གཏན་ནས་མིན་ཏེ། སྤྱིར་ན་འགྲོ་བ་མི་ནི་བདག་འཛིན་དང་མ་རུང་ཞེན་ཆགས་ཀྱི་དབང་དུ་ཤོར་བའི་ངན་གཤིས་ཅན་ཞིག་ཡིན་པས། ཆོས་ལུགས་ལ་ཇི་ཙམ་དད་པ་ཆེ་བ་དེ་ཙམ་གྱིས་དེ་ལ་བདག་འཛིན་གྱི་ཞེན་པ་ཆེ་རུ་སོང་སྟེ། ཆོས་ལུགས་གཞན་ལ་དད་པ་བྱེད་མཁན་གྱི་མགོ་བོ་གཅོད་ཅིང་། ཆོས་ལུགས་གཞན་གྱི་ཁྱབ་ཁོངས་ཀྱི་ཡུལ་གྲུ་ལ་དཔུང་འཇུག་དམར་གསོད་ཐེངས་མང་བྱུང་ཞིང་འབྱུང་བའི་ལོ་རབས་སྟོང་ཕྲག་དུ་མའི་ཡུན་ལ། ད་ལྟའི་བར་དུ་ནང་པ་སངས་རྒྱས་པའི་ལོས་རྒྱུས་ནང་དུ། ཕྲག་དོག་གི་དབང་དུ་ཤོར་ཏེ། ཆོས་ལུགས་གཞན་ལ་དད་པ་བྱེད་པའི་མི་རྣམས་ཀྱི་མགོ་བོ་བཅད་པའི་ལོ་རྒྱུས་མེད་ལ། རྒྱལ་ཁམས་དང་ཡུལ་ཁམས་ལ་ཆོས་ལུགས་ཀྱི་ཆེད་དུ་དཔུང་འཇུག་དང་དམར་གསོད་བྱས་པའི་ལོ་རྒྱུས་ཤོག་ངོས་གཅིག་མེད་པར། འཚེ་མེད་ཞི་བའི་ངང་ནས་རང་ཚུགས་ཐུབ་པ་ནི་བརྫུ་འཕྲུལ་ནང་གི་བརྫུ་འཕྲུལ་ངོ་མཚར་ཅན་ཞིག་ཅི་ལ་མིན།
དེ་བས་ཀྱང་ངོ་མཚར་བ་ཞིག་ལ་སངས་རྒྱས་ཀྱི་བསྟན་པ་ལ་གུས་བརྩི་མི་ཤེས་པར་གཏོར་རྒོལ་དམར་གསོད་བྱེད་མཁན་རྣམས་ལའང་། བྱམས་བརྩེ་དང་སྙིང་རྗེའི་སེམས་པ་མ་དོར་བར། ཁྱོད་ཀྱིས་འགྲོ་བ་ཡོངས་ཀྱི་སྤྱིར་ནོར་ཞིག་རྩ་མེད་གཏོང་བའི་སྡིག་ཉེས་ཚབས་ཆེན་བསགས་སོང་། ཀྱེ་མ་སྙིང་རེ་རྗེ་གསུངས། གཞན་དག་ལྟ་ཅི་ཐ་ན་འདོད་པ་མྱ་ངན་མེད། གཏུམ་པོ་མྱ་ངན་མེད་ཅེས་འདོད་ཆགས་དང་ཞེ་སྡང་ཚད་བརྒལ་ཅན་གྱི་སྐྱེ་བོ་དེ་ཡང་། སངས་རྒྱས་ཀྱི་ཆོས་ཀྱི་ཉམས་ལེན་ལ་གཞོལ་མཐར། ཆོས་རྒྱལ་མྱ་ངན་མེད་ཅེས་སུ་བསྔགས་ཅིང་བསྟོད་ཡུལ། འཛམ་གླིང་ཡོངས་ཀྱི་དབུ་ཁྲིད་རྣམས་ཀྱི་མིག་དཔེ་ལྟ་ས་ཞིག་ཏུ་གྱུར་ཡོད་དེ།
དེ་ཡང་ནུབ་ཕྱོགས་ཀྱི་གྲགས་ཅན་རྩོམ་པ་པོ། ( (Geoffrey་Mortimer) མོར་ཊི་མར་གྱིས་འདི་གསུངས་མྱོང་། ནང་པ་སངས་རྒྱས་པའི་ཆོས་ལ་ཁ་ཕྱོགས་ཏེ་བལྟས་ཚེ་ཁྱེད་ཀྱིས་ཆོས་རྒྱལ་མྱ་ངན་མེད་ཀྱིས་བླ་ན་མེད་པའི་བཟང་སྤྱོད་སློབ་ཁྲིད་ལམ་སྟོན་བྱེད་པ་ཙམ་མ་ཟད། རང་ཉིད་རྒྱལ་པོ་ཡིན་པའི་དབང་ཤུགས་བེད་སྤྱོད་གནང་ཕྱོགས་དེས་དེང་དུས་ཀྱི་ཆོས་ལུགས་གཞན་གྱི་གཙོ་བདག་རྣམས་ཁ་སྐྱེངས་དགོས་པར་བཟོས་ཡོད་པ་ཤེས་ཐུབ། ཅེས་གསུངས་མྱོང་། དེ་ལྟར་སངས་རྒྱས་ཀྱི་བསྟན་པའི་རྗེས་འཇུག་པ་རྣམས་ཀྱིས་མི་ལོ་ཉིས་སྟོང་ལྔ་བརྒྱའི་རིང་ལ། འགྲོ་བ་མི་རིགས་སྤྱིའི་བཟང་སྤྱོད་ཀྱི་འགན་བཞེས་ཏེ། བཟོད་སྲན་དང་དྲང་བདེན། རིས་མེད་ཀྱི་བྱམས་བརྩེའི་ལམ་སྟོན་དེ་དག་ནི་མི་ལོ་རྒྱུས་ནང་གི་ཆེས་ལྟ་ན་སྡུག་པ་དེ་ཡིན།