སྤྱི་ཚོགས་ཞབས་ཞུ
༡༽ དུས་ཀྱི་སྙིགས་མ་འདིར་རང་གཞན་སེམས་ཅན་རྣམས་ཉོན་མོངས་པས་ཀུན་ནས་བསླངས་པའི་ལས་ངན་མང་དུ་བགྱིས་པའི་རྣམ་པར་སྨིན་པས། ས་གཡོམ་པ་དང་། ཆུ་རྒྱུགས་པ། མེ་མཆེད་པ། ཐོག་འབེབས་པ། སྐར་མདའ་ལྟུང་བ། རིམས་ནད་ལྡང་བ། དེ་བཞིན་དུ་རླངས་འཁོར་དང་འཕྲུལ་འཁོར་སོགས་བརྡབ་རྐྱེན་གྱིས་དུས་མིན་འཆི་བའི་ཆག་སྒོ་གདུག་པ་ཅན་མང་པོ་ཞིག་འཕྲད་བཞིན་སྐབས་འདིར། སྤྱིར་སྐྱེ་འགྲོ་ཡོངས་ལ་ཕན་འདོད་ཀྱིས་ཀུན་ནས་བསླངས་ཏེ་སྨོན་ལམ་ཁ་ཞེ་གཉིས་མེད་ཀྱིས་སྨོན་ལམ་འདེབས་ཞོར། སྒོས་སུ་ལག་ལེན་ཐད་ལ་གང་ནུས་གང་ཅི་ནུས་ཀྱིས། འདི་གའི་ས་གནས་ས་ཐོག་ཐའེ་ཝན་ལུང་པའི་ཡུལ་མི་རྣམས་ལ་ས་གཡོམ། ཆུ་ལོག མེ་སྐྱོན་དང་རླངས་འཁོར་བརྡབ་སྐྱོན་སོགས་རྐྱེན་ངན་གོད་ཆགས་བྱུང་རིགས་ལ། རྒྱལ་སྤྱིའི་ཐའེ་ཝན་བོད་བརྒྱུད་ནང་བསྟན་ཞིབ་འཇུག་ཚོགས་པ་ནས་གདུང་སེམས་དང་ལྷག་བསམ་མཚོན་བྱེད། གཤིན་པོ་ལ་བསྔོ་སྨོན་དང་། གསོན་པོ་ལ་ཆོས་ཀྱི་སྦྱིན་པ་གང་ནུས་ཞུས་ཤིང་ཞུ་མུས་སུ་མཆིས།
༢༽ གཞན་ཡང་ཆོས་ཀྱི་སྐལ་བ་དབེན་བས་བླང་དོར་ལ་མིག་ལྡོང་བས་ནག་ཉེས་དང་སྡིག་པ་བསགས་པའི་སྐྱེ་བོ་མང་སའི་བཙོན་ཁང་ཁག་ཏུ། རིས་མེད་ཀྱི་མཁན་སྤྲུལ་དགེ་བཤེས་རྣམས་ཆེད་ཕེབས་ཀྱིས་དེ་དག་ལ་ཆོས་ཀྱི་སྦྱིན་པ་བྱིན་ཏེ་ཆོས་ཀྱི་མིག་བསྩལ་བའི་སྒོ་ནས་སྤྱི་ཚོགས་ཀྱི་ཞབས་ཞུ་སྒྲུབ་རྒྱུ་དང་།
༣༽ དེ་བཞིན་དུ་བཅོས་སུ་མེད་པའི་སྐྲན་ནད་ཀྱིས་ཟིན་པའི་ནད་པ་རྣམས་ལ། སེམས་ཁམས་ལ་ཕན་པའི་ཆོས་ཀྱི་ཉམས་ལེན་གྱི་གཏམ་དང་། དེ་བཞིན་ཆོ་ག་རྣམ་པར་དག་པའི་སྒོ་ནས་རིམ་གྲོ་འདོན་པ་སོགས་ཀྱི་ལམ་ནས་སྤྱི་ཚོགས་ཞབས་ཞུ་གང་ཐུབ་སྒྲུབ་རྒྱུ།
༤༽ མཐོ་སློབ་ཁག་ཏུ་ནང་ཆོས་ལ་དོ་སྣང་ཅན་རྣམས་ལ་ནང་པའི་ལྟ་གྲུབ་སོགས་ཀྱི་ངོ་སྤྲོད་མཚམས་སྦྱོར་གྱི་གོ་སྐབས་འབུལ་རྒྱུ་དང་། དེ་ཙམ་དུ་མ་ཟད་སློབ་ཕྲུག་སྒེར་སོ་སོའི་ངོས་ནས་ནང་ཆོས་དང་འབྲེལ་བའི་གནས་ཚུལ་གོ་རྟོགས་དགོས་རིགས་ལའང་། ནང་ཆོས་དང་འབྲེལ་བའི་གནས་ཚུལ་མཁོ་འདོན་ཀྱི་ལམ་སྟོན་བྱེད་རྒྱུ།
༥༽ ལོ་རེར་དམིགས་བསལ་གྱི་དུས་ཆེན་དང་བསྟུན་ནས་རྒྱལ་ས་ཐའེ་པེ་གཙོས་པའི་གྲོང་ཁྱེར་ཁག་གི་ས་གནས་གནད་ཡོད་དག་ཏུ། མི་མང་རྣམས་ལ་དཀར་ཟས་ཀྱི་ཟས་སྦྱིན་རྒྱ་ཆེན་བསྩལ་རྒྱུ་བཅས་སོ། །