དེང་རབས་དང་མཐུན་པའི་ནང་བསྟན་འཆད་སྤེལ་གྱི་ཟབ་སྦྱོང་།
སྐྱེ་འགྲོ་རྣམས་ཀྱི་རྣམ་དཔྱོད་དང་བསོད་ནམས་ཉམས་དམས་སུ་གྱུར་ཅིང་། ལེ་ལོ་དང་རྣམ་གཡེང་གི་དབང་དུ་གྱུར་ཏེ། སངས་རྒྱས་ཀྱི་བསྟན་པའི་སྙིང་པོ་ཟབ་ཆོས་སྙིང་པོ་རྣམས་ལ་ཉམས་སུ་ལེན་པའི་སྐལ་བ་ཅན་ཉིན་མོའི་སྐར་མ་བཞིན་དཀོན་པའི་སྐབས་འདིར། གདུལ་བྱ་རྣམས་ཀྱི་ཁམས་དང་བསམ་པ་དང་མོས་པ་འཚམས་པའི་འཆད་ཁྲིད་གནང་ཐབས་ཀྱི་ཟབ་སྦྱོང་ཞིག་གོ་སྒྲིག་ཐུབ་ན་དགེ་མཚན་ཆེ་བའི་དགོངས་ཚུལ་གཞིར་བཞག་གིས། མཁྱེན་བརྩེ་ཐེབས་རྩ་ཆོགས་པས་ལམ་སྟོན་དང་རྒྱབ་སྐྱོར་ཤུགས་ཆེར་གནང་བ་ལྟར། འདིར་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་དུས་རིམ་དང་པོའི་ནང་ཆོས་འཆད་སྤེལ་གྱི་ཟབ་སྦྱོང་ཐེངས་དང་པོ་དེ་ཉིད་༢༠༢༡ སྤྱི་ཟླ་༠༣ ཚེས་༠༡ གཅིག་ཉིན་རྒྱལ་ས་ཐའེ་པེ་ལ་དབུ་ཚུགས
ཟབ་སྦྱོང་གི་ཆེད་དུ་དམིགས་བསལ་ལས་རིགས་སོ་སོའི་ནང་བསྟན་ཁྲོམ་རའི་བརྗོད་གཞི་དང་འབྲེལ་བའི་མཁས་དབང་དང་ཆེད་མཁས་པ་བཅུ་ཙམ་གདན་འདྲེན་ཞུས་ཡོད་པར་མ་ཟད། དམིགས་བསལ་ཟབ་སྦྱོང་དབུ་འཛུགས་ཀྱི་མཛད་སྒོར་ཇི་ལྟར་གསོལ་འདེབས་ཞུས་དོན་ལྟར་དབུ་འབྱེད་ཉིན་མོའི་སྐུ་མགྲོན་གཙོ་བོ་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཕྱག་བསྟར་ངེས་སྟོན་པ་དང་། དགའ་ལྡན་ཁྲི་ཐོག་ཁང་གི་དྲུང་ཆེ་ཤར་རྩེ་མཁན་ཟུར་བྱང་ཆུབ་ཆོས་ལྡན་མཆོག་དྲྭ་ཐོག་ནས་ཕེབས་ཏེ་ཟབ་སྦྱོང་དང་འབྲེལ་བའི་བཀའ་སློབ་བསྩལ།