དེ་ཡང་། ༢༠༢༠ སྤྱི་ཟླ་༠༨ ཚེས་ ༡༣ ཉིན། ཐའེ་ཝན་རྒྱལ་སྤྱི་བོད་བརྒྱུད་ནང་བསྟན་ཞིབ་འཇུག་ཚོགས་པ་ནས་ནང་བསྟན་དར་སྤེལ་བགྲོང་གླེང་སྐབས་དགུ་པ་འདི་ཉིད་ཐའེ་ཝན་དུ་འཚོགས་ཡོད། སྐབས་དེར་དམིགས་བསལ་ཐའེ་ཝན་དུ་མཛད་ཕྲིན་སྐྱོང་བཞིན་པའི་བོད་བརྒྱུད་ནང་བསྟན་གྱི་བླ་ཆེན་ཁག་ཅིག་དང་། ཐའེ་ཝན་རྒྱལ་ཡོངས་ནང་བསྟན་མཐུན་ཚོགས་ཀྱི་ཚོགས་གཙོ་སློབ་དཔོན་ཅིང་གཡའོ་མཆོག་སོགས་དམིགས་བསལ་གྱི་སྐུ་མགྲོན་རྣམས་ཕེབས་ཐོག ཚོགས་འདུའི་ཐོག་ཐའེ་ཝན་གནས་བཞུགས་བོད་བརྒྱུད་ནང་བསྟན་ཆོས་བརྒྱུད་རིས་སུ་མ་ཆད་པའི་མཁན་སྤྲུལ་དགེ་བཤེས་དགེ་འདུན་འདུས་པ་བརྒྱ་ཕྲག་ལྷག་མཉམ་ཞུགས་གནང་ཡོད། ཚོགས་འདུའི་ཐོག་ཏུ་བརྗོད་གཞི་གཙོ་བོ་དུས་རབས་མཐུན་པའི་ལམ་ནས་སངས་རྒྱས་ཀྱི་བསྟན་པ་སྤྱི་དང་། ཡང་སྒོས་སུ་བོད་བརྒྱུད་ནང་བསྟན་རིན་པོ་ཆེ་འདི་ཉིད་ལྟར་འཛིན་སྐྱོང་དང་། ལྷག་པར་དུ་འཆད་སྤེལ་ཇི་ལྟར་གནང་དགོས་མིན་ཐད་ལ་རིས་མེད་ཆོས་བརྒྱུད་ཀྱི་མཁས་དབང་རྣམ་པས་བགྲོ་གླེང་ལྷུག་པོར་གནང་བ་མ་ཟད། དེར་འདུས་པའི་དགེ་འདུན་པ་བྱིངས་ནས་ཀྱང་དྲི་བ་དྲི་ལན་གྱི་གོ་སྐབས་བཞེས་ཏེ། བརྗོད་གཞིའི་གནད་དོན་གཙོ་བོ་གཞན་ཞིག་ནི། ས་གནས་ཀྱི་གནས་བབ་ལས་གཞིགས་ཏེ། དགེ་འདུན་པའི་སྤྱོད་ལམ་དང་མཛད་འགན་སོགས་ཀྱི་ཐད་ལའང་དགོངས་ཚུལ་ལྷུག་པོར་བརྩལ་ཡོད། མཛད་སྒོ་དེ་དང་འབྲེལ་ཏེ། འཛམ་གླིང་སྤྱི་དང་བྱེ་བྲག་ལ་འཕྲད་བཞིན་པའི་དཀའ་ངལ་རིགས་དང་། ལྷག་པར་དུ་ཏོག་དབྱིབས་རིམས་ནད་ཀྱི་གནོད་འཚེ་ལས་མྱུར་དུ་གྲོལ་བའི་ཆེད་དུ་གསོལ་འདེབས་ཐུགས་སྨོན་གྱི་མཛད་རིམ་ཞིག་ཀྱང་དམིགས་བསལ་ལོགས་སུ་གོ་སྒྲིག་ཞུས་ཡོད།