བསྟན་པའི་སྲི་ཞུ་དངོས་ནི་མཐའ་འཁོབ་ཏུ་ཆོས་སྤེལ་བ་འདི་ཁོ་ན་ཡིན་ཕྱིར་རང་ཅག་གིས་ཡུལ་གཞན་དུ་ཆོས་སྤེལ་སྐབས་ས་ཆ་དེ་ག་ནས་དབང་བསྐུར་བ་སོགས་ཀྱིས་ནོར་བསྒྲུབས་ནས་ཕ་ཡུལ་ལམ་གནས་གཞན་དུ་ཁྱེར་ཏེ་དཀོན་མཆོག་ལ་མཆོད་འབུལ་སོགས་བྱེད་པ་ལས་ས་ཆ་དེ་གའི་མི་རྣམས་ལ་ཐོས་བསམ་བསྒོམ་གསུམ་བྱེད་ཚུལ་གྱི་བསླབ་སྟོན་གནང་བ་ཇི་ལྟར་གཙིགས་སུ་འཛིན་རྒྱུ། ༼ ༢ ༽ དམ་པའི་ཆོས་སྤེལ་བའི་སྙིང་གནད་ནི་ཆོས་ཀྱི་དོན་གོ་བརྡ་སྤྲོད་པ་འདི་རང་ཡིན་མོད་རང་ཅག་གིས་ཆོས་ཀྱི་མཛད་སྒོའི་ཐད་ལ་དབང་བསྐུར་བ་དང་སྦྱིན་སྲེག་དང་ཚོགས་འཁོར་དང་རིམ་གྲོ་སོགས་གཙོ་བོ་བྱེད་པ་ལས་འཆད་ཉན་ལ་གཙོ་བོར་མཛད་པ་ཤིན་ཏུ་ཉུང་བ་མངོན་གསལ་ཡིན་པས་དེའི་ཐད་ལ་བསྒྱུར་བཅོས་ཇི་ལྟར་བྱེད་རྒྱུ། ༼ ༣ ༽ ས་གནས་དེ་གའི་སྤྱི་ཕན་གྱི་བྱ་བའི་ནང་དུ་ཞུགས་པ་ནི་སྤྱིར་ཐེག་པ་ཆེན་པོའི་ཆོས་ཉམས་ལེན་གྱི་ཆ་ཤས་ཤིག་ཡིན་ཞིང་། ཁྱད་པར་དུ་དུས་རབས་འདིར་གལ་ཆེ་བའི་བྱ་བ་ཞིག་ཡིན་ན་ཡང་རང་ཅག་གིས་དེ་གཙིགས་སུ་བཟུང་མི་འདུག་པས་ཞན་ཆ་དང་མ་འདང་བའི་ཆ་དེ་རྣམས་ཇི་ལྟར་ཁ་སྐོང་རྒྱུ། ༼ ༤ ༽ ཤ་བཟའ་བ་སོགས་ཡུལ་དེའི་མི་རྣམས་ཀྱིས་ཆེས་སྐྱོན་ཅན་དུ་བརྩི་བའི་བྱ་བ་འགའ་རེ་ལ་འཛེམ་མ་ནུས་པ་སོགས་ཀྱི་དབང་གིས་འགྲོ་དོན་དང་འཕྲིན་ལས་ལ་བར་ཆད་དམ་བཀག་འགོག་མང་པོ་བྱུང་དང་འབྱུང་བཞིན་པར་ཇི་ལྟར་ཡོ་བཅོས་བྱེད་རྒྱུ་བཅས་ཀྱི་བརྗོད་གཞིའི་ཐོག་གཏམ་བཤད་དང་བགྲོ་གླེང་གནང་ཡོད། མཐར་ཐེངས་འདིའི་ཚོགས་འདུའི་གོ་སྒྲིག་ཚོགས་གཙོ་བླ་རུང་ཐེག་གསུམ་ཆོས་གླིང་གི་དབུ་འཛིན་སྤྲུལ་སྐུ་ཐུབ་བསྟན་ནོར་བུ་མཆོག་གནས་ཚོགས་འདུའི་མཇུག་སྡོམ་གྱི་གཏམ་བཤད་གནང་རྗེས་ཉིན་འདིའི་བགྲོ་གླེང་ཚོགས་འདུ་རྒྱལ་ཁའི་ངང་ནས་ཡོངས་སུ་མཇུག་གྲོལ། དུས་མཚུངས། ཚོགས་ཐོག་འདིར། མཁན་པོ་ཚུལ་རྣམ་རིན་པོ་ཆེ་ནས་ཁོང་གིས་གཙོ་འགན་བཞེས་ནས་གོ་སྒྲིག་གནང་བཞིན་པའི་སྤྱི་ཟླ་གསུམ་པའི་ཚེས་སུམ་ཅུ་དང་སོ་གཅིག་སྟེ་ཉིན་གཉིས་རིང་གི་རྒྱལ་སྤྱིའི་ནང་པའི་ཚོགས་འདུའི་སྐོར་དང་འབྲེལ་བའི་གཏིང་ནོན་གསལ་བསྒྲགས་ཀྱི་གསུང་བཤད་དང་། མཁན་པོ་ཆོས་ཉིད་དོན་རྟོགས་ནས་སྤྱི་ཟླ་ལྔ་པར་དབུ་འབྱེད་གནང་གཏན་ཁེལ་བའི་ཐའེ་ཝན་བོད་བརྒྱུད་དྲ་བརྙན་གྱི་མིག་སྔའི་ལས་རིམ་དང་དབུ་འབྱེད་གནང་ཕྱོགས།་ནང་དོན་འཚོལ་སྡུད་སོགས་ཀྱི་སྐོར་ལ་སྙན་གསེང་ཞུས་གནང་ཡོད།