དེ་ཡང་གཙོ་བོ་ཆོས་བརྒྱུད་བར་གྱི་མཐུན་ལམ། ཁྱད་པར་ཡུལ་དུས་དང་མཐུན་པའི་ཀུན་སྤྱོད་གཟབ་ནན་གྱི་ཕྱོགས་ལ་སྔར་ལས་ལྷག་པའི་ཤུགས་སྣོན་ཇི་ལྟར་བྱ་ཕྱོགས། ཡང་དག་པའི་ཆོས་ཀྱི་ངོ་སྤྲོད་སོགས་ཀྱི་བྱ་ཐབས་ལ་སྔར་ལས་ལྷག་པའི་ཤུགས་སྣོན་བརྒྱུད་ཐའེ་ཝན་རྒྱ་ཆེའི་མི་མང་གིས་བོད་ཀྱི་ནང་ཆོས་ཀྱི་གོ་རྟོགས་མཐོ་རུ་གཏོང་རྒྱུ་དང་། ཐའེ་ཝན་གྱི་མི་མང་ལ་ཆོས་ཀྱི་བྱ་ཐབས་གཙོ་བོར་གྱུར་པས་སྤྱི་ཚོགས་ཞབས་ཞུའི་ལས་དོན་ཞུ་རྒྱུ། དེ་བཞིན་མི་མང་ལ་ལྟ་སྤྱོད་གང་ཅིའི་ཐད་ནས་བཟང་ཕྱོགས་ཀྱི་མིག་ལྟོས་བསྐྲུན་རྒྱུ་གལ་ཆེའི་རང་བཞིན། གཞན་ཕྱོགས་ཀྱིས་བོད་བརྒྱུད་ནང་བསྟན་ལ་ཁ་ཟེར་བཞིན་པ་ཁག་གི་ཟེར་སྒྲོས་ལ་གཟབ་ཉན་གྱིས་ཕྱོགས་སྔའི་བསམ་སྟངས་བཤད་སྟངས་ངེས་པར་རྟོགས་དགོས་པ་སོགས་ཀྱི་ཐད་དགོངས་ཚུལ་མང་ཤོས་བྱུང་། དེ་བཞིན་དམིགས་བསལ་མངོན་ཚན་ཅན་གྱི་བཤད་ཡམ་ཁག་གི་ཐད་ལན་འདེབས་བྱེད་སྟངས་ཀྱི་ནང་དོན་དངོས་ཀྱི་ཐད་ལ་དཔེ་མཚོན་སྣ་ཚོགས་བཀོད་དེ་གོ་བསྡུར་གནང་། མཐར། མདོ་འཛིན་པས་རྩ་བའི་བརྗོད་གཞི་གཉིས་དང་རྗེས་འབྲེལ་གྱི་གྲུབ་དོན་གཙོ་བོ་དོན་ཚན་ཁག་བཞི་གྲོས་གཞིར་བཀྲམས་ཤིང་། དེར་ཚོགས་ཞུགས་པ་ཡོངས་ཀྱིས་དུས་ཚོད་རྒྱས་བཅད་ནང་ཐ་མའི་བགྲོ་གླེང་དང་སྦྱངས་བཤད་གྲུབ་རྗེས། གྲོས་གཞི་བཞིའི་ཁོངས་ནས། དོན་ཚན་གཉིས་པ། བོད་བརྒྱུད་ནང་བསྟན་ལ་དགག་པ་རྒྱག་མཁན་དག་ལ་ཆོས་བརྒྱུད་ཁག་ལྔ་ལས་གྲུབ་པའི་ལན་འདེབས་ཚོགས་ཆུང་ཞིག་ཞིག་བཙུགས་ནས་དེས་ཕྱོགས་སྔའི་དགག་པ་གཙོ་བོའི་རིགས་བོད་བསྒྱུར་བྱ་རྒྱུའི་མཚོན་པའི་ལས་དོན་བྱེད་རྒྱུ། ཞེས་པ་དང་། དོན་ཚན་བཞི་པ། ད་ལྟའི་བོད་བརྒྱུད་ཀྱི་ལྟ་སྤྱོད་གནས་སྟངས་སོགས་ལ་གཞན་གྱིས་སྐྱོན་བརྗོད་བྱེད་བཞིན་པའི་གནས་སྟངས་དངོས་དང་འབྲེལ་བའི་སྙན་ཞུའི་ཡི་གེ་ཞིག་ཚོགས་ཞུགས་པ་ཐུན་མོང་གི་མཚན་ཐོག་ནས་བོད་ཀྱི་བླ་ཆེན་ཁག་དང་གདན་ས་དང་བཤད་གྲྭ་ཆེན་པོ་ཁག་བཅས་སུ་འབུལ་རྒྱུ་གཉིས་མང་མོས་ཀྱིས་བརྡས་ཐག་གཅོད་གནང་། མཐར་ཐེངས་འདིའི་ཚོགས་འདུའི་གོ་སྒྲིག་ཚོགས་གཙོ་དང་ཚོགས་འདུའི་གཙོ་འཛིན་པ་མཁན་པོ་ཆོས་ཉིད་དོན་རྟོགས་ནས་ཞིབ་འཇུག་ཚོགས་པའི་འབྱུང་འགྱུར་གྱི་ལས་འཆར་སྐོར་དང་ཐུགས་རྗེ་ཆེ་ཞུའི་གཏམ་བཤད་གནང་རྗེས་ཉིན་འདིའི་བགྲོ་གླེང་ཚོགས་འདུ་རྒྱལ་ཁའི་ངང་ནས་ཡོངས་སུ་མཇུག་གྲོལ།